സാമൂഹിക മാധ്യമമായ ഇൻസ്റ്റഗ്രാമിന് തകരാർ. ഇൻസ്‌റ്റഗ്രാം അക്കൗണ്ടുകൾ സസ്‌പെൻഡ് ചെയ്യപ്പെട്ടെന്ന പരാതിയുമായി ഉപയോക്താക്കൾ. യാതൊരു മുന്നറിയിപ്പും കൂടാതെ തങ്ങളുടെ അക്കൗണ്ടുകൾ സസ്‌പെൻഡ് ചെയ്യപ്പെട്ടന്നാണ് ഉയരുന്ന ആരോപണം. ട്വിറ്ററിലൂടെ നിരവധി ഉപയോക്താക്കൾ ആരോപണവുമായി രംഗത്ത് വന്നിട്ടുണ്ട്. ഉപയോക്താക്കൾ disagree with decision ഓപ്‌ഷനിൽ ക്ലിക്ക് ചെയ്‌ത ശേഷവും അക്കൗണ്ട് വീണ്ടെടുക്കാൻ കഴിയുന്നില്ലെന്നും ആരോപിക്കുന്നു.ഇന്ത്യയിലെയും മറ്റ് രാജ്യങ്ങളിലെയും നിരവധി ഇൻസ്‌റ്റഗ്രാം ഉപയോക്താക്കൾ ലോഗിൻ പ്രശ്‌നങ്ങൾ നേരിടുന്നുണ്ടെന്നും മറ്റുള്ളവർ “സെർവർ കണക്ഷനുമായി” ബന്ധപ്പെട്ട പ്രശ്‌നങ്ങൾ അഭിമുഖീകരിക്കുന്നുണ്ടെന്നും ഡൗൺഡിക്‌ടർ എന്ന ഔട്ടേജ് ട്രാക്കർ ചൂണ്ടിക്കാണിക്കുന്നു.അതേസമയം, ഇതൊരു സെർവർ സൈഡ് പ്രശ്‌നമാണെന്ന് മെറ്റ അറിയിച്ചു. കമ്പനി ഇക്കാര്യം പരിശോധിച്ചുവരികയാണെന്നും ട്വീറ്റിലൂടെ കമ്പനി പറഞ്ഞു, “നിങ്ങളിൽ ചിലർക്ക് ഇൻസ്‌റ്റഗ്രാം അക്കൗണ്ട് ആക്‌സസ് ചെയ്യുന്നതിൽ പ്രശ്‌നങ്ങളുണ്ടെന്ന് ഞങ്ങൾക്കറിയാം. അത് പരിശോധിക്കുകയും അസൗകര്യത്തിൽ ക്ഷമ ചോദിക്കുകയും ചെയ്യുന്നു” ട്വീറ്റിൽ വ്യക്തമാക്കി.ഈ സേവനതടസം എല്ലാവരെയും ബാധിച്ചിട്ടില്ല. ഉദാഹരണത്തിന്, ഇന്ത്യ ടുഡേ ടെക്കിലെ ഒരു അംഗം മാത്രമേ നിലവിൽ ഈ പ്രശ്‌നം നേരിടുന്നുള്ളൂ, മറ്റുള്ളവർക്ക് തടസമില്ലാതെ ഇൻസ്‌റ്റഗ്രാം സേവനങ്ങൾ ഉപയോഗിക്കാൻ കഴിയുന്നുണ്ട്. മെറ്റാ ഉടമസ്ഥതയിലുള്ള മറ്റ് പ്ലാറ്റ്‌ഫോമുകളായ ഫേസ്ബുക്ക്, വാട്‍സ്ആപ്പ്, മെസഞ്ചർ എന്നിവ യാതൊരു കുഴപ്പവുമില്ലാതെ പ്രവർത്തിക്കുന്നുണ്ട്.നേരത്തെ കീഴിലുള്ള മെസേജിങ് പ്ലാറ്റ്‌ഫോമായ വാട്ട്‌സ്ആപ്പ് കഴിഞ്ഞയാഴ്‌ച ഇന്ത്യയിലും മറ്റ് രാജ്യങ്ങളിലും വലിയ തകരാർ നേരിട്ടിരുന്നു. ഏകദേശം രണ്ട് മണിക്കൂറോളം ആപ്പ് ലഭ്യമായിരുന്നില്ല. പിന്നീട് സാങ്കേതിക കാരണങ്ങൾ കൊണ്ടാണ് ഇത് സംഭവിച്ചതെന്ന് വിശദീകരണവുമായി കമ്പനി രംഗത്ത് വന്നിരുന്നു