ന്യൂഡൽഹി: കേരളത്തിന്റെ മുൻ മുഖ്യ തെരഞ്ഞെടുപ്പ് ഓഫീസർ ടിക്കാറാം മീണ ഇനി രാജസ്ഥാനിലെ കോൺഗ്രസിന്റെ നേതൃനിരയിലേക്ക്. കഴിഞ്ഞയാഴ്ച്ച കോൺഗ്രസിൽ ചേർന്ന മീണയെ രാജസ്ഥാൻ നിയമസഭാ തെരഞ്ഞെടുപ്പിനുള്ള 21 അംഗ മാനിഫെസ്റ്റോ കമ്മിറ്റിയുടെ കോ കൺവീനറായി നിയമിച്ചു. ഈ വർഷം ഡിസംബറിലാണ് രാജസ്ഥാനിൽ നിയമസഭാ തെരഞ്ഞെടുപ്പ്.മുതിർന്ന കോൺഗ്രസ് നേതാവ് സി പി ജോഷിയുടെ നേതൃത്വത്തിലുള്ളതാണ് 21 അംഗ മാനിഫെസ്റ്റോ കമ്മിറ്റി. രാജസ്ഥാനിൽ കോൺഗ്രസിന്റെ പ്രചരണ പരിപാടികളിലും മീണ സജീവമാകും. കഴിഞ്ഞയാഴ്ച്ച ഡൽഹിയിൽ വെച്ചാണ് ടിക്കാറാം മീണ കോൺഗ്രസിൽ ചേർന്നത്. സംഘടനാ ജനറൽ സെക്രട്ടറി കെ സി വേണുഗോപാലുമായി കൂടിക്കാഴ്ച നടത്തിയിരുന്നു.സംസ്ഥാന അഗ്രികൾച്ചറൽ പ്രൊഡക്ഷൻ കമ്മീഷണർ ഉൾപ്പെടെ വിവിധ സ്ഥാനങ്ങൾ വഹിച്ച ടീക്കാറാം മീണ തന്റെ ആത്മകഥയായ ‘തോൽക്കില്ല ഞാൻ’ കഴിഞ്ഞ വർഷം മലയാളം പതിപ്പ് പുറത്തിറക്കിയിരുന്നു. മുഖ്യമന്ത്രി പിണറായി വിജയന്റെ പൊളിറ്റിക്കൽ സെക്രട്ടറി പി.ശശിക്കെതിരെയുള്ള അപകീർത്തികരമായ പരാമർശങ്ങളുടെ പേരിൽ വക്കീൽ നോട്ടീസ് നൽകിയതോടെ പുസ്തകം രാഷ്ട്രീയ വൃത്തങ്ങളിലും കോളിളക്കം സൃഷ്ടിച്ചിരുന്നു.