ആലപ്പുഴ: ഭാര്യയെ മർദ്ദിച്ച് ബോധം കെടുത്തിയ ശേഷം കെട്ടിത്തൂക്കിക്കൊന്ന കേസിൽ ഭർത്താവിനും കാമുകിക്കും കോടതി ജീവപര്യന്തം തടവ് ശിക്ഷ വിധിച്ചു. പാലമേൽ മറ്റപ്പള്ളി ഉളവുകാട്ട് ആദർശ് ഭവനിൽ സുനിൽകുമാർ (46), ഇയാളുടെ കാമുകി പാലമേൽ മറ്റപ്പള്ളി ശ്രീരാഗ് ഭവനത്തിൽ ശ്രീലത (53) എന്നിവർക്കാണ് മാവേലിക്കര അഡീഷണൽ സെഷൻസ് കോടതി ജീവപര്യന്തം തടവും 50,000 രൂപ പിഴയും ശിക്ഷ വിധിച്ചത്. കൊല്ലപ്പെട്ട അമ്പിളിയുടെ (38) രണ്ട് മക്കൾക്ക് പിഴത്തുക നൽകാനും കോടതി ഉത്തരവിട്ടു. 2018 മേയ് 27-നാണ് ഈ സംഭവം നടന്നത്.സംഭവത്തിന്റെ പശ്ചാത്തലംചാരുംമൂട് നൂറനാട്, സുനിൽകുമാറും ഭാര്യ അമ്പിളിയും അയൽവാസിയായ ശ്രീലതയും അടുത്തടുത്താണ് താമസിച്ചിരുന്നത്. ശ്രീലതയുമായി സുനിൽകുമാറിന് അവിഹിത ബന്ധമുണ്ടായിരുന്നു. ഇത് അറിഞ്ഞിട്ടും അമ്പിളി രണ്ടു മക്കളുടെ ഭാവിയോർത്ത് ഈ ബന്ധം സഹിച്ചു. എന്നാൽ ശ്രീലതയെ വിവാഹം കഴിക്കാനായി സുനിൽകുമാർ ശ്രമം തുടങ്ങിയതോടെ പ്രശ്നങ്ങൾ ഗുരുതരമായി. സംഭവത്തിന് രണ്ട് ദിവസം മുൻപ് സുനിൽകുമാർ ശ്രീലതയുടെ വീട്ടിലേക്ക് പോയിട്ട് തിരികെ വന്നില്ല. തുടർന്ന് അമ്പിളി ശ്രീലതയുടെ വീട്ടിലെത്തുകയും ഇരുവരെയും ഒരുമിച്ച് കാണുകയും ചെയ്തു.ഇത് വാക്കുതർക്കത്തിലേക്കും വഴക്കിലേക്കും നയിച്ചു. തുടർന്ന് അമ്പിളി വീട്ടിലേക്ക് മടങ്ങിപ്പോയെങ്കിലും പിന്നാലെയെത്തിയ സുനിൽകുമാർ വീണ്ടും വഴക്ക് തുടങ്ങി. വാക്കുതർക്കത്തിനൊടുവിൽ സുനിൽകുമാർ അമ്പിളിയെ തലയ്ക്കടിച്ച് ബോധം കെടുത്തി. തുടർന്ന് മൃതദേഹം സ്റ്റെയർകേസിനടിയിൽ കെട്ടിത്തൂക്കി ആത്മഹത്യയാണെന്ന് വരുത്തിത്തീർക്കാൻ ശ്രമിച്ചു.മരണത്തിലെ ദുരൂഹതയും അന്വേഷണവുംആത്മഹത്യയാണെന്ന ആദ്യ നിഗമനത്തിന് വിരുദ്ധമായി, മരപ്പണിക്കാരനായ സുനിൽകുമാർ മരത്തടി കെട്ടാൻ സാധാരണ ഉപയോഗിക്കുന്ന രീതിയിലുള്ള കെട്ടാണ് അമ്പിളിയുടെ കഴുത്തിൽ ഉണ്ടായിരുന്നത്. ഇത് പൊലീസിന് സംശയമുണ്ടാക്കി. തുടർന്ന് നടത്തിയ അന്വേഷണത്തിലാണ് കൊലപാതകമാണെന്ന് തെളിഞ്ഞത്. ശ്രീലതയെ വിവാഹം കഴിക്കാൻ അമ്പിളി തടസ്സമായിരുന്നെന്ന് സുനിൽകുമാർ സമ്മതിച്ചു.ശ്രീലതയുടെ പ്രേരണയിലാണ് സുനിൽകുമാർ ഈ കൃത്യം ചെയ്തതെന്ന് കോടതി കണ്ടെത്തി. സുനിൽകുമാറിനെതിരെ കൊലപാതകം, മാരകമായി ദേഹോപദ്രവം ഏൽപ്പിക്കൽ തുടങ്ങിയ വകുപ്പുകളും, ശ്രീലതയ്ക്കെതിരെ കൊലപാതകം, പ്രേരണാക്കുറ്റം തുടങ്ങിയ വകുപ്പുകളും ചുമത്തി. കേസിൽ മാവേലിക്കര അഡീഷണൽ സെഷൻസ് കോടതി ജഡ്ജി പി. ശ്രീദേവി വിധി പ്രസ്താവിക്കുകയും പ്രതികളെ ജുഡീഷ്യൽ കസ്റ്റഡിയിൽ വിടുകയും ചെയ്തു