കൊച്ചി: ഐഎസിലെ നിർണായക പോരാട്ടത്തിൽ മഞ്ഞപ്പടയ്ക്ക് വമ്പൻ ജയം. ഗ്രീക്ക് താരം ദിമിത്രിയോസ് ഡയമൻറക്കോസിൻറെ ഇരട്ട ഗോൾ കരുത്തിലാണ് മഞ്ഞപ്പട വിജയം നേടിയത്. നോർത്ത് ഈസ്റ്റ് യുണൈറ്റഡിനെ സ്വന്തം മൈതാനത്ത് എതിരില്ലാത്ത രണ്ട് ഗോളിന് തകർത്തു.ലീഡെടുക്കാനുള്ള സുവർണാവസരങ്ങൾ ആദ്യ മിനിറ്റിൽ തന്നെ ലഭിച്ചെങ്കിലും 42-ാം മിനിറ്റിലും 44-ാം മിനിറ്റിലും വല കുലുക്കി ദിമിത്രിയോസ് ഡയമൻറക്കോസ് കേരള ബ്ലാസ്റ്റേഴ്സിന് വിജയമൊരുക്കിയത്. വിജയത്തോടെ ടീം പോയൻറ് പട്ടികയിൽ വീണ്ടും മൂന്നാം സ്ഥാനത്തെത്തി. നേരത്തെ മുംബൈ സിറ്റിക്കെതിരെയും എഫ്സി ഗോവക്കെതിരെയും പരാജയപ്പെട്ട ടീം പോയിൻറ് പട്ടികയിൽ അഞ്ചാം സ്ഥാനത്തേക്ക് വീണിരുന്നു. പ്ലേ ഓഫിന് മുമ്പ് ഇനി 6 മത്സരങ്ങൾ മാത്രമാണ് ബാക്കിയുള്ളത്. പ്ലേ ഓഫ് പ്രതീക്ഷയുള്ള ബ്ലാസ്റ്റേഴ്സിന് ഈ വിജയം വലിയ ആശ്വാസം പകരുന്നുണ്ട്.ജിയാന്നുവിനെയും ദിമിത്രിയോസ് ഡയമൻറക്കോസിനേയും ആക്രമണത്തിന് നിയോഗിച്ച് 4-2-2 ശൈലിയിലാണ് ഇവാൻ വുകോമനോവിച്ച് തൻറെ ടീമിനെ അണിനിരത്തിയത്. കരൺജിത് സിംഗ് ഗോൾവല കാക്കാനിറങ്ങിയപ്പോൾ മലയാളി താരം കെ.പി. രാഹുലും ആദ്യ ഇവലനിൽ ഇടംപിടിച്ചു. ഹോം ഗ്രൗണ്ടിൽ തുടക്കം മുതൽ അവസരങ്ങൾ തുറന്നെങ്കിലും നോർത്ത് ഈസ്റ്റ് ഗോളി അരിന്ദം ഭട്ടാചാര്യയെ മറികടന്ന് വലയിലേക്ക് പ്രവേശിക്കാൻ കേരള ബ്ലാസ്റ്റേഴ്സിനായില്ല. 33-ാം മിനുറ്റിൽ ലൂണയുടെ മഴവിൽ ഫ്രീകിക്കിൽ ഗോൾ പ്രതീക്ഷിച്ചെങ്കിലും പന്ത് ഗോളിയുടെ കൈകളിൽ അവസാനിച്ചു.പിന്നാലെ ഗ്യാലറിയിൽ ആർത്തുവിളിച്ച ആരാധകർക്ക് ആഘോഷിക്കാൻ ആദ്യ ഗോളെത്തി. 42-ാം മിനിറ്റിൽ ബ്രൈസ് മിറണ്ടയുടെ അസിസിറ്റിൽ ദിമിത്രിയോസിൻറെ ഫിനിഷ്. രണ്ട് മിനിറ്റുകൾക്ക് ശേഷം അഡ്രിയാൻ ലൂണയുടെ പാസിൽ നിന്ന് ദിമിത്രിയോസ് നോർത്ത് ഈസ്റ്റിന് മേലുള്ള പ്രഹരം ഇരട്ടിയാക്കി.