ഒമ്പത് കോടി രൂപകൂടി സമാഹരിക്കാനായാൽ മലയാളി യുവാവിന്റെ ജീവൻ രക്ഷിക്കാം…

സൗ​ദി അറേബ്യയിലെ ജയിലിൽ കഴിയുന്ന മലയാളി യുവാവ് അബ്ദുറഹീമിന് ജീവിതത്തിനും മരണത്തിനുമിടയിൽ ഇനിയുള്ളത് മൂന്നു ദിവസങ്ങൾ മാത്രം. അതിനകം ഒമ്പത് കോടി രൂപകൂടി സമാഹരിക്കാനായാൽ ദിയാപണമായ 34 കോടി രൂപ നൽകി അബ്ദുറഹീമിന്റെ ജീവൻ രക്ഷിക്കാനാകും. ലോകമെമ്പാടുമുള്ള മലയാളികളുടെ സഹായത്തോടെ ഇതിനോടകം 25 കോടി രൂപ സമാഹരിക്കാനായിട്ടുണ്ട്.വധശിക്ഷയ്ക്ക് വിധിക്കപ്പെട്ട് സൗദി അറേബ്യയിലെ ജയിലിൽ കഴിയുന്ന അബ്ദുറഹീമിന്റെ മോചനത്തിനായി ബാക്കി തുക ക​ണ്ടെത്താനുള്ള നെട്ടോട്ടത്തിലാണ് പ്രിയപ്പെട്ടവർ. മകൻ ജീവനോടെ തിരിച്ചുവരുമെന്ന പ്രതീക്ഷയിൽ കാത്തിരിക്കുകയാണ് അബ്ദുറഹീമിന്റെ മാതാവ് ഫാത്തിമയും.അബ്ദുറഹീമിനെ സഹായിക്കാൻ കൈകോർക്കാം:MP ABDUL RAHIM LEGAL ASSISTANCE COMMITTEEA/C NO 074905001625IFSC CODE ICIC0000749BRANCH: ICICI MALAPPURAMകഴിഞ്ഞ 16 വർഷമായി റിയാദ് ജയിലിൽ കഴിയുകയാണ് കോഴിക്കോട് കോടമ്പുഴ മച്ചിലകത്ത് പീടിയേക്കൽ വീട്ടിൽ അബ്ദുറഹീം. 2006 നവംബറിൽ 26ആം വയസിലാണ് അബ്ദുറഹീം ഹൗസ് ഡ്രൈവർ വിസയിൽ റിയാദിൽ എത്തിയത്. സ്‌പോൺസർ ഫായിസ് അബ്ദുല്ല അബ്ദുറഹ്മാൻ അൽ ഷഹ്രിയുടെ മകൻ അനസിനെ പരിചരിക്കലായിരുന്നു പ്രധാന ജോലി. കഴുത്തിന് താഴെ ചലനശേഷി ഇല്ലാത്ത അനസിന് ഭക്ഷണം നൽകിയിരുന്നത് കഴുത്തിൽ ഘടിപ്പിച്ച ഉപകരണം വഴിയായിരുന്നു. 2006 ഡിസംബർ 24നാണ് അബ്ദുറഹീമിന്റെ കൂടെ ജി.എം.സി വാനിൽ യാത്ര ചെയ്യുകയായിരുന്ന അനസ് മരിച്ചത്. ഷോപ്പിംഗിനായി പുറത്തു പോകുമ്പോൾ ട്രാഫിക് സിഗ്‌നൽ കട്ട് ചെയ്യാൻ ആവശ്യപ്പെട്ട് അനസ് റഹീമിനോട് വഴക്കിട്ടു. ഇത് അനുസരിക്കാതിരുന്ന അബ്ദുറഹീമിന്റെ മുഖത്ത് അനസ് പല തവണ തുപ്പി. ഇത് തടയാൻ ശ്രമിച്ചപ്പോൾ അബദ്ധത്തിൽ കൈ കഴുത്തിലെ ഉപകരണത്തിൽ തട്ടുകയും അനസ് ബോധരഹിതനാകുകയും മരിക്കുകയും ചെയ്തു.