തിരുവനന്തപുരം: കളമശേരി സാമ്ര കണ്വെന്ഷന് സെന്ററിലുണ്ടായ സ്ഫോടനത്തിന്റെ അന്വേഷണം എൻഐഎ ഏറ്റെടുക്കും. കൊച്ചിയിലേയ്ക്ക് ഡൽഹിയിൽ നിന്നുള്ള അഞ്ചംഗ സംഘം എത്തുമെന്നും റിപ്പോർട്ടുകൾ. എന്നാൽ ടിഫിൻ ബോക്സിൻ വച്ച ബോംബാണ് സ്ഫോടനത്തിനിടയാക്കിയത് എന്നാണ് പ്രഥമിക നിഗമനം. ഐഇഡിയുടെ അവഷിഷ്ടങ്ങൾ കണ്ടെത്തിയിട്ടുണ്ട്.കളമശ്ശേരിയിലെ സാമ്ര ഇന്റർനാഷനൽ കൺവൻഷൻ സെന്ററില് ഇന്ന് രാവിലെയാണ് സ്ഫോടനമുണ്ടായത്. സംഭവത്തിൽ ഒരാൾ കൊല്ലപ്പെടുകയും 35 പേർക്ക് പരിക്കേൽക്കുകയും ചെയ്തു. മരിച്ചത് സ്ത്രീയണെന്നാണ് പ്രാഥമിക വിവരം. ഇവരുടെ മൃതദേഹം പൂർണമായും കത്തിക്കരിഞ്ഞ നിലയിലായിരുന്നു. പരിക്കേറ്റവരെ കളമശ്ശേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇതിൽ പലരുടെയും നില ഗുരുതരമാണ്. സ്ഫോടനമുണ്ടാകുമ്പോൾ ഏകദേശം 2400 പേർ കൺവെൻഷൻ സെന്ററിലുണ്ടായിരുന്നു എന്നാണ് ദൃക്സാക്ഷികള് പറയുന്നത്.സ്ഫോടത്തില് പരിക്കേറ്റവര്ക്ക് മികച്ച ചികിത്സയൊരുക്കാന് ആരോഗ്യ വകുപ്പ് ഡയറക്ടര്ക്കും മെഡിക്കല് വിദ്യാഭ്യാസ വകുപ്പ് ഡയറക്ടര്ക്കും നിര്ദേശം നല്കി. 35 പേരാണ് നിലവിൽ ചികിത്സ തേടിയിട്ടുള്ളത്. ഏഴ് പേർ ഐസിയുവിലാണ്. അവധിയിലുള്ള മുഴുവന് ഡോക്ടര്മാര് ഉള്പ്പെടെയുള്ള ആരോഗ്യ പ്രവര്ത്തകരും അടിയന്തരമായി തിരിച്ചെത്താന് നിര്ദേശം നല്കിയിട്ടുണ്ട്. കളമശേരി മെഡിക്കല് കോളേജ്, എറണാകുളം ജനറല് ആശുപത്രി, കോട്ടയം മെഡിക്കല് കോളേജ് എന്നിവിടങ്ങളില് അധിക സൗകര്യങ്ങളൊരുക്കാനും നിര്ദേശം നല്കി.