തിരുവനന്തപുരം: രോഗികള്ക്കും കൂട്ടിരിപ്പുകാര്ക്കും മികച്ച സേവനങ്ങൾ ലഭ്യമാക്കുന്നതിന്റെ ഭാഗമായി ആശുപത്രികളില് സോഷ്യല് വര്ക്കര്മാരുടെ സേവനം ഉറപ്പാക്കുമെന്ന് മന്ത്രി വീണാ ജോര്ജ് അറിയിച്ചു. സംസ്ഥാനത്തെ മെഡിക്കല് കോളേജുകളില് ആവിഷ്ക്കരിച്ച് നടപ്പിലാക്കി വരുന്ന ക്വാളിറ്റി ഇംപ്രൂവ്മെന്റ് ഇനിഷ്യേറ്റീവിന്റെ ഭാഗമായാണ് നടപടി.മെഡിക്കല് കോളേജുകളില് ജനസൗഹൃദ അന്തരീക്ഷം സൃഷ്ടിക്കുക, ചികിത്സയുടെയും സേവനങ്ങളുടെയും ഗുണനിലവാരം മെച്ചപ്പെടുത്തുക ആരോഗ്യ പ്രവര്ത്തകര്ക്ക് മികച്ച അന്തരീക്ഷം സൃഷ്ടിക്കുക എന്നിവയാണ് പദ്ധതിയുടെ ലക്ഷ്യം. എം.എസ്.ഡബ്ല്യു./ഹോസ്പിറ്റല് അഡ്മിനിസ്ട്രേഷന് ബിരുദമുള്ളവരുടെ സേവനമാണ് ഇതിലൂടെ രോഗികൾക്ക് ലഭ്യമാക്കുന്നത്.അത്യാഹിത വിഭാഗത്തില് സമയബന്ധിതമായി മികച്ച ചികിത്സ നല്കുന്നതോടൊപ്പം രോഗികള്ക്കും കൂട്ടിരിപ്പുകാര്ക്കും സഹായകരമായ രീതിയിലുള്ള പ്രവര്ത്തനങ്ങളും പ്രധാനമാണ്. ജനങ്ങള്ക്ക് സഹായകരമാകുന്ന പബ്ലിക് റിലേഷന്സ് പ്രവര്ത്തനങ്ങള്ക്കാണ് ഇവരുടെ സേവനം വിനിയോഗിക്കുകയെന്നും മന്ത്രി വ്യക്തമാക്കി.രോഗികളുമായും കൂട്ടിരിപ്പുകാരുമായും സൗഹൃദ അന്തരീക്ഷം സൃഷ്ടിക്കുന്നതിന് കണ്ട്രോള് റൂമും പി.ആര്.ഒ. സേവനവും ലഭ്യമാക്കാന് മന്ത്രി വീണാ ജോര്ജ് ഉന്നതതല യോഗത്തില് നിര്ദേശം നല്കിയിരുന്നു.മന്ത്രിയുടെ നിര്ദേശത്തെ തുടര്ന്ന് മെഡിക്കല് വിദ്യാഭ്യാസ വകുപ്പ് ഡയറക്ടര് ഇതുസംബന്ധിച്ച് സര്ക്കുലര് ഇറക്കുകയും ചെയ്തിട്ടുണ്ട്. ഡോക്ടര്മാര്, നഴ്സിംഗ്, പാരാമെഡിക്കല് സ്റ്റാഫ് എന്നിവരടങ്ങുന്ന മള്ട്ടി ഡിസിപ്ലിനറി ടീമില് ഒരംഗമായി ഇവര് പ്രവര്ത്തിക്കണം. രോഗികളെയും കുടുംബാംഗങ്ങളെയും മറ്റ് ടീമംഗങ്ങളെയും ഏകോപിപ്പിക്കുകയും സഹായിക്കുകയും ചെയ്യണം. രോഗിക്കും കുടുംബത്തിനും അവര്ക്ക് മനസിലാകുന്ന ഭാഷയില് രോഗാവസ്ഥ പറഞ്ഞ് കൊടുക്കണം. രോഗികള്ക്ക് സഹായകമായ സര്ക്കാര് സ്കീമുകളെക്കുറിച്ച് മനസിലാക്കിക്കൊടുക്കുകയും സഹായിക്കുകയും വേണം. ഇതോടൊപ്പം ഡിസ്ചാര്ജിലും ബാക്ക് റഫറലിലും ഡോക്ടറെ സഹായിക്കുകയും വേണം