കശ്മീര്‍ ചുറ്റിക്കറങ്ങാൻ ഇനി എന്തെളുപ്പം; കിടിലന്‍ പാക്കേജുമായി ഐആര്‍സിടിസി; ടിക്കറ്റ് നിരക്കുകൾ ഇങ്ങനെ

സഞ്ചാരികളുടെ സ്വപ്നഭൂമിയാണ് കാശ്മീർ. ഒരിക്കലെങ്കിലും ആ മണ്ണിൽ കാലുകുത്താൻ ആഗ്രഹിക്കാത്ത സഞ്ചാരികളുണ്ടാകില്ല. മറ്റുള്ളവരെപ്പോലെ കശ്മീര്‍ യാത്ര ഒരു സ്വപ്‌നമായി കൊണ്ടുനടക്കുന്നവരാണോ നിങ്ങള്‍? എങ്കിലിതാ ഒരടിപൊളി പാക്കേജുമായി എത്തിയിരിക്കയാണ് ഇന്ത്യന്‍ റെയില്‍വേ.ജന്നത്ത്-ഇ-കശ്മീര്‍ എന്ന് പേരിട്ടിരിക്കുന്ന ഈ യാത്ര ഏപ്രില്‍ ഒന്‍പതിനാണ് ആരംഭിക്കുക. അങ്ങോട്ടും ഇങ്ങോട്ടുമുള്ള വിമാന ടിക്കറ്റുകളും മറ്റ് യാത്ര ചിലവുകളും താമസവും ഭക്ഷണവും സൈറ്റ്‌സീയിങും ഉള്‍ക്കൊള്ളുന്നതാണ് പാക്കേജ്. നാല് ദിവസം ഹോട്ടല്‍ താമസവും ഒരു ദിവസം ഹൗസ് ബോട്ടിലെ താമസവുമാണ് ഒരുക്കുക. ആറ് ദിവസം നീണ്ടു നില്‍ക്കുന്ന ഒരു ബഡ്ജറ്റ് പാക്കേജാണ് ഐ.ആര്‍.സി.ടി.സി പ്രഖ്യാപിച്ചിരിക്കുന്നത്.സോന്‍മാര്‍ഗ്, ഗുല്‍മാര്‍ഗ്, പഹല്‍ഗാം, ദാല്‍ തടാകം എന്നിങ്ങനെ കശ്മീരിലെ പ്രധാനപ്പെട്ട വിനോദസഞ്ചാര കേന്ദ്രങ്ങളെല്ലാം സന്ദര്‍ശിക്കാനുള്ള അവസരങ്ങളുണ്ടാകും. യാത്രക്കാര്‍ തിരഞ്ഞെടുക്കുന്ന പാക്കേജുകള്‍ക്കനുസരിച്ച് 41,300 മുതല്‍ 61,000 വരെയാണ് ഒരാള്‍ക്കുള്ള നിരക്ക്. 60,100 രൂപയുള്ള ഒരു ടിക്കറ്റ് രണ്ട് പേര്‍ ചേര്‍ന്നെടുക്കുമ്പോള്‍ അത് ഒരാള്‍ക്ക് 44,900 രൂപയായി കുറയും. മൂന്നാള്‍ ചേര്‍ന്ന് എടുക്കുമ്പോള്‍ അത് 44,000 രൂപയായും കുറയും. 41,300 രൂപയാണ് കുട്ടികള്‍ക്കുള്ള നിരക്ക്.