ടെൻഷൻ ഇല്ലാത്ത ആരും ഉണ്ടാകില്ല. ജോലി, കുടുംബത്തിലെ ഉത്തരവാദിത്വങ്ങൾ, കുട്ടികളുടെ കാര്യങ്ങൾ, ദുരന്തങ്ങൾ എന്നിങ്ങനെ ധാരാളം കാര്യങ്ങൾ നമ്മെ ടെൻഷനടിപ്പിക്കുന്നു. ചില കാര്യങ്ങൾ ശ്രദ്ധിച്ചാൽ നമുക്ക് ടെൻഷനെ കുറയ്ക്കാൻ കഴിയും.ചില ടെൻഷനുകൾ നമുക്ക് ഒഴിവാക്കാൻ പറ്റില്ല. അതിനെക്കുറിച്ച് ചിന്തിച്ചുകൊണ്ടേയിരുന്നാൽ ടെൻഷൻ കൂടുകയല്ലാതെ കുറയില്ല.നമുക്കും മറ്റുള്ളവർക്കും പല പരിമിതികളുമുണ്ടെന്ന് അംഗീകരിക്കുക. നർമ്മബോധം കാത്തുസൂക്ഷിക്കുക. ചില അബദ്ധങ്ങൾ സംഭവിക്കുമ്പോൾ അതിനെ തമാശയായി കാണുക. ഇതെല്ലാം ടെൻഷൻ കുറയ്ക്കാൻ നമ്മളെ സഹായിക്കും.ടെൻഷൻ വരുമ്പോഴുണ്ടാകുന്ന നിങ്ങളുടെ ചിന്തകൾ, വികാരങ്ങൾ, പെരുമാറ്റരീതികൾ ഇവയെക്കുറിച്ചൊക്കെ ഒരു പുസ്തകത്തിൽ എഴുതിവെക്കാം. ഇത്തരം കാര്യങ്ങൾ തിരിച്ചറിഞ്ഞാൽ കുറച്ചുകൂടി നന്നായി സമ്മർദത്തെ നേരിടാനാകും. കൂടാതെ, ടെൻഷൻ അടിപ്പിക്കുന്ന കാര്യങ്ങൾ ഒഴിവാക്കാനുള്ള മാർഗങ്ങളെക്കുറിച്ചും ചിന്തിക്കാം. അത് ബുദ്ധിമുട്ടാണെങ്കിൽ അതു നമ്മളിൽ ഏൽപ്പിക്കുന്ന ആഘാതം പരമാവധി കുറയ്ക്കാനെങ്കിലും ശ്രമിക്കാവുന്നതാണ്. ഉദാഹരണത്തിന്, നിങ്ങൾക്കു ചെയ്യാനുള്ള കാര്യങ്ങൾ കുറെക്കൂടെ കാര്യക്ഷമമായ രീതിയിൽ ചെയ്യാനാകുമോ? സമയം കുറച്ചുകൂടി മെച്ചമായി ഉപയോഗിക്കാൻ കഴിയുമോ? എന്ന് ചിന്തിക്കുക.കുറച്ചൊക്കെ ചിട്ടയോടെ കാര്യങ്ങൾ ചെയ്യുക. പലതും ‘പിന്നെ ചെയ്യാം, പിന്നെ ചെയ്യാം’ എന്നു മാറ്റിവെക്കുമ്പോൾ കാര്യങ്ങൾ കൂടുതൽ അലങ്കോലപ്പെടും, നിങ്ങളുടെ ടെൻഷൻ കൂടും.വിശ്രമിക്കാൻ സമയം കണ്ടെത്തുക. നിങ്ങൾ ഇഷ്ടപ്പെടുന്ന കാര്യങ്ങൾ ചെയ്യുമ്പോൾ നിങ്ങളുടെ ടെൻഷൻ കുറയും. ക്രമമായ വ്യായാമം നല്ല ആരോഗ്യം തരും.ആരോഗ്യകരമായ ശീലങ്ങൾ വളർത്തുക. ശാരീരികാധ്വാനം കൂടുതൽ ഉന്മേഷം തരും. അത് ടെൻഷൻ നേരിടാൻ നിങ്ങളുടെ ശരീരം കൂടുതൽ സജ്ജമാകും. പോഷകമൂല്യമുള്ള ഭക്ഷണം കഴിക്കുക. ചില നേരം ഭക്ഷണം കഴിക്കാതിരിക്കുന്ന രീതി മാറ്റുക. ആവശ്യത്തിനു വിശ്രമം കിട്ടുന്നുണ്ടെന്ന് ഉറപ്പാക്കുക.ടെൻഷൻ കൂടിക്കൂടി വരുകയാണെങ്കിൽ ഒരു ഡോക്ടറുടെ സഹായം തേടണം. അതിൽ ഒട്ടും മടി വിചാരിക്കേണ്ട കാര്യമില്ല. ടെൻഷൻ മറികടക്കാൻ (ഇംഗ്ലീഷ്) എന്ന ഡോ. ടിം ക്യാന്റഫറിന്റെ പുസ്തകത്തിൽ ‘ദയകൊണ്ട് ടെൻഷനെ തോൽപ്പിക്കാം’ എന്നൊരു പാഠമുണ്ട്. മറ്റുള്ളവരോടു ദയയോടെ ഇടപെടുമ്പോൾ നമ്മുടെ ആരോഗ്യവും സന്തോഷവും വർധിക്കുമെന്ന് അതിൽ അദ്ദേഹം അഭിപ്രായപ്പെടുന്നു. നമ്മൾ നമ്മളിൽത്തന്നെ യാഥാർഥ്യബോധമില്ലാത്തതോ അതിരുകവിഞ്ഞതോ ആയ പ്രതീക്ഷകൾ വെക്കരുത്. എന്നാൽ നമ്മൾ നമ്മളെത്തന്നെ വിലകുറച്ച് കാണാനും പാടില്ല.പ്രാധാന്യം അനുസരിച്ച് ജോലികൾ ചിട്ടപ്പെടുത്തുക. ഇത്, ആദ്യം ചെയ്യേണ്ട ജോലി ഏതാണെന്നു തിട്ടപ്പെടുത്താനും പ്രധാനപ്പെട്ട ജോലിക്കു നല്ല ശ്രദ്ധ കൊടുക്കാനും സഹായിക്കും. കൂടാതെ, മറ്റാർക്കെങ്കിലും ജോലി ഏൽപ്പിച്ചുകൊടുക്കണോ, ചില ജോലികൾ നീട്ടിവെക്കണോ അതോ ഒഴിവാക്കണോ എന്നൊക്കെ തീരുമാനിക്കാനും ഇതു നിങ്ങളെ സഹായിക്കും.നിങ്ങൾ സമയം എങ്ങനെ ഉപയോഗിക്കുന്നു എന്ന് ഒരാഴ്ചത്തേക്ക് എഴുതിവെക്കുക. എന്നിട്ട് സമയം ഉപയോഗിക്കുന്ന കാര്യത്തിൽ എങ്ങനെ മെച്ചപ്പെടാം എന്നു ചിന്തിക്കുക. സമയം എത്രമാത്രം നിങ്ങളുടെ കൈപ്പിടിയിൽ ഒതുക്കാൻ പറ്റുമോ അത്രയും നിങ്ങളുടെ സമ്മർദം കുറയും.വിശ്രമിക്കാൻ അല്പം സമയം മാറ്റിവെക്കുക. ചെറിയ ഒരു ഇടവേളയ്ക്കുപോലും നിങ്ങളുടെ ടെൻഷൻ കുറയ്ക്കാനും പുത്തൻ ഉണർവ് സമ്മാനിക്കാനും കഴിയും.നിമ്മളെ മനസ്സിലാക്കാൻ കഴിയുന്ന ആരോടെങ്കിലും കാര്യങ്ങൾ തുറന്നു സംസാരിക്കുക. വിശ്വസ്തനായ ഒരു കൂട്ടുകാരനു നിങ്ങളെ സഹായിക്കാൻ കഴിഞ്ഞേക്കും. അങ്ങനെ മനസ്സിന്റെ ഭാരം ഒന്ന് ഇറക്കിവെക്കുന്നതു നിങ്ങളെ കൂടുതൽ ആശ്വസിപ്പിക്കും.