കാസര്ഗോഡ്: റെയില്വെ ട്രാക്കില് യുവതിയെ മരിച്ച നിലയില് കണ്ടെത്തി. കാസര്ഗോഡ് പള്ളിക്കരയില് ഇന്നലെ രാത്രി ഒന്പതോടെയാണ് അപകടം നടന്നതെന്ന് കരുതുന്നതായി പൊലീസ് പറഞ്ഞു. ഓടി കൊണ്ടിരുന്ന ട്രെയിനില് നിന്ന് വീണതാകാമെന്നാണ് നിഗമനം. വയനാട് കാവുംമന്ദം മഞ്ജുമലയില് വീട്ടില് എവി ജോസഫിന്റെ മകള് ഐശ്വര്യ ജോസഫ് (30) ആണ് മരിച്ചത്.പള്ളിക്കര മസ്തിഗുഡ്ഡെയില് റെയില്വെ ട്രാക്കിന് സമീപത്താണ് മൃതദേഹം കണ്ടെത്തിയത്. ബേക്കല് ഭാഗത്ത് പാളത്തില് ഒരാള് വീണു കിടക്കുന്നുവെന്ന വിവരം മറ്റൊരു ട്രെയിനിന്റെ ലോക്കോ പൈലറ്റ് കാസര്ഗോഡ് റെയില്വെ പൊലീസിനെ അറിയിക്കുകയായിരുന്നു. ഉടന് സ്ഥലത്തെത്തിയ പൊലീസ് യുവതിയെ കണ്ടെത്തി ആശുപത്രിയില് എത്തിച്ചെങ്കിലും മരണം സ്ഥിരീകരിക്കുകയായിരുന്നു.മൃതദേഹത്തിന് സമീപത്ത് നിന്ന് ലഭിച്ച പഴ്സിലെ തിരിച്ചറിയല് കാര്ഡില് നിന്നാണ് യുവതിയെ തിരിച്ചറിഞ്ഞത്. കോഴിക്കോട്ടെ ഒരു സ്വകാര്യ സ്ഥാപനത്തില് ഹ്യൂമന് റിസോര്സ് മാനേജരാണ് ഐശ്വര്യ.