മണിയൂർ: മണിയൂർ പാലയാട് നടയിൽ കൗതുകമായി ഭീമൻ കടലാമ. തിങ്കളാഴ്ച രാവിലെയാണ് പാലയാട് നട ചൊവ്വാപ്പുഴയോട് ചേർന്ന തോട്ടിൽനിന്ന് ആമയെ കണ്ടെത്തിയത്. ഏകദേശം നൂറു കിലോക്കടുത്ത് ആമക്ക് ഭാരമുള്ളതായി കണ്ടെത്തി.തോണിയിൽ തോട്ടിലൂടെ വരുകയായിരുന്ന തുരുത്തിയിൽ രാജീവനാണ് ആമയെ കണ്ടത്. വെള്ളത്തിൽ വലിയ ജീവിയെ കണ്ട രാജീവൻ ആദ്യം പരിഭ്രമിച്ചെങ്കിലും പിന്നീട് ആമയാണെന്ന് തിരിച്ചറിയുകയായിരുന്നു.നാട്ടുകാരായ നാല് യുവാക്കൾ ആമയെ കരക്കെത്തിക്കുകയുണ്ടായി. കുറ്റ്യാടി പുഴയുടെ ഭാഗമായ ചൊവ്വാപ്പുഴയിലേക്ക് കടലിൽനിന്ന് വഴിതെറ്റിയെത്തിയതെന്നാണ് കരുതുന്നത്. കടലിൽ കാണുന്ന ചുവന്ന നിറത്തിലുള്ള ആമയാണെന്നാണ് നിഗമനം. കൊളാവിപ്പാലത്തെ ആമവളർത്തുകേന്ദ്രത്തിലെ പ്രവർത്തകരെത്തി ആമയെ കൊണ്ടുപോയി.