പാലക്കാട്: പട്ടാമ്പി തൃത്താല കണ്ണനൂരിൽ യുവാവിനെ വെട്ടിക്കൊന്നു. ഓങ്ങല്ലൂർ കൊണ്ടൂർക്കര സ്വദേശി അൻസാർ ആണ് മരിച്ചത്. തന്നെ സുഹൃത്ത് വെട്ടി പരിക്കേല്പിച്ചതായി ആശുപത്രി അധികൃതരോട് അൻസാർ പറഞ്ഞതായും സൂചനയുണ്ട്. കാറിലെത്തിയ സംഘം കത്തികൊണ്ട് വെട്ടിയെന്നാണ് പ്രാഥമിക നിഗമനം. സംഭവത്തിൽ പൊലീസ് അന്വേഷണം നടത്തിവരികയാണ്.പട്ടാമ്പി തൃത്താല റോഡില് കരിമ്പനക്കടവിന് സമീപം റോഡില് രക്തക്കറ കണ്ടെത്തിയതിനെ തുടര്ന്ന് നാട്ടുകാരാണ് പൊലിസിനെ വിവരമറിയിച്ചത്. തുടര്ന്ന് നടന്ന അന്വേഷണത്തില് കരിമ്പനക്കടവില് ഭാരതപ്പുഴയിലേക്ക് ഇറങ്ങുന്ന ഭാഗത്തും പുഴയ്ക്കരികിലെ പൊന്തക്കാടുകള്ക്കിടയിലും ചോരപ്പാട് കണ്ടെത്തി. ഇതിനിടയില് പട്ടാമ്പിയിലെ സ്വകാര്യ ആശുപത്രിയില് യുവാവ് ചികിത്സ തേടിയെത്തുകയും ചെയ്തു. കഴുത്ത് മുറിഞ്ഞ നിലയിലായിരുന്ന യുവാവ് വിദഗ്ധ ചികിത്സയ്ക്ക് മുമ്പ് മരണപ്പെടുകയായിരുന്നു. കരിമ്പനക്കടവിന് സമീപം ഒരു കാര് ഉപേക്ഷിക്കപ്പെട്ട നിലയിലും കണ്ടെത്തി. കാറിനുള്ളില് കത്തിയുടെ കവറും പൊലീസ് കണ്ടെടുത്തു.