കോഴിക്കോട്: നവകേരള ബസ് നാളെ മുതൽ വീണ്ടും സര്വീസ് ആരംഭിക്കും. കോഴിക്കോട് നിന്നും എല്ലാ ദിവസവും രാവിലെ 8.30 ന് ബെംഗളുരുവിലേക്കും തിരികെ രാത്രി 10.30നുമാണ് സര്വീസ്. രാവിലെ 8.30 ന് കോഴിക്കോട് നിന്നും സര്വീസ് ആരംഭിക്കുന്ന ബസ് വൈകിട്ട് നാലരയോടെ ബെംഗളുരുവിൽ എത്തും. തിരികെ രാത്രി 10.30 ന് യാത്ര തിരിക്കുന്ന ബസ്സ് പിറ്റേ ദിവസം പുലര്ച്ചെ നാലരയോടെ കോഴിക്കോട് എത്തും. കല്പ്പറ്റ, സുല്ത്താന് ബത്തേരി, മൈസൂര് എന്നിവിടങ്ങളിലാണ് ബസ്സിന് സ്റ്റോപ്പ് ഉള്ളത്.ഓണ്ലൈന് ടിക്കറ്റ് ബുക്കിംഗ് നിരക്ക് അടക്കം 911 രൂപയാണ് ചാർജ്. ആദ്യ മൂന്നു ദിവസത്തെ ബെംഗളൂരുവിലേക്കുള്ള ടിക്കറ്റ് ബുക്കിംഗ് പൂര്ത്തിയായി. എസി ഗരുഡ പ്രീമിയം സര്വീസായാണ് നവ കേരള ബസ് ഓടുന്നത്. കഴിഞ്ഞ ദിവസമാണ് സീറ്റ് വർധിപ്പിച്ചു രൂപമാറ്റം വരുത്തിയ ബസ് ബെംഗളൂരുവില് നിന്നും കോഴിക്കോട് എത്തിച്ചത്. ബസ്സില് അധികമായി 11 സീറ്റുകള് ഘടിപ്പിക്കുകയും എസ്കലേറ്ററും പിന് ഡോറും ഒഴിവാക്കി പകരം മുന്നിലൂടെ കയറാവുന്ന സംവിധാനമാക്കുകയും ചെയ്തിരുന്നു.