തിരുവനന്തപുരം: കേരള സംസ്ഥാന ലോട്ടറി വകുപ്പിന്റെ ക്രിസ്മസ് പുതുവത്സര ബമ്പർ ലോട്ടറി ടിക്കറ്റിന്റെ അച്ചടി നിർത്തിവച്ചു. സമ്മാനഘനടയിലെ ആശയക്കുഴപ്പം നിലനിൽക്കുന്ന സാഹചര്യത്തിലാണ് ലോട്ടറി ടിക്കറ്റിന്റെ പ്രിന്റിംഗ് താത്ക്കാലികമായി നിർത്തിവച്ചിരിക്കുന്നത്. സമ്മാനഘനടയിൽ മാറ്റം വരുത്തിയതോടെയാണ് പ്രതിസന്ധി ഉടലെടുത്തത്.പൂജാ ബമ്പർ ലോട്ടറിയുടെ നറുക്കെടുപ്പിന് ശേഷം ക്രിസ്മസ് ബമ്പർ ലോട്ടറിയുടെ വില്പന ആരംഭിക്കുകയാണ് പതിവ്. എന്നാൽ പൂജാ ബമ്പർ നറുക്കെടുപ്പ് കഴിഞ്ഞ് രണ്ടു ദിവസത്തിന് ശേഷവും ക്രിസ്മസ് ബമ്പറിന്റെ വില്പന ആരംഭിച്ചിട്ടില്ല. ക്രിസ്മസ് പുതുവത്സര ബമ്പർ ലോട്ടറി ടിക്കറ്റിന്റെ സമ്മാന ഘടനയിൽ മാറ്റം വരുത്തിയിരുന്നു. ഇതിന് പിന്നാലെ ലോട്ടറി ഏജന്റുമാർ പ്രതിഷേധത്തിലാണ്. ഈ സാഹചര്യത്തിലാണ് ആശയക്കുഴപ്പം പരിഹരിക്കാത്തതിനാൽ അച്ചടി നിർത്തിവച്ചത്.ക്രിസ്മസ് ബമ്പർ നറുക്കെടുപ്പിൽ 5000, 2000, 1000 രൂപയുടെ സമ്മാനങ്ങൾ വെട്ടിക്കുറച്ചതിലാണ് ഏജന്റുമാർ പ്രതിഷേധിക്കുന്നത്,. സമ്മാനഘടനയിൽ മാറ്റം വരുത്തണമെന്നാവശ്യപ്പെട്ട് ലോട്ടറി ക്ഷേമനിധി ബോർഡ് ചെയർമാൻ ലോട്ടറി ഡയറക്ടർക്ക് കത്ത് നൽകിയിരുന്നു.